Lyfjabókin

Voltaren

Voltaren er bólgueyðandi lyf með verkjastillandi og hitalækkandi verkun. Virka efnið díklófenak dregur úr myndun prostaglandínefna í líkamanum, en þau stuðla m.a. að bólgumyndun. Díklófenak er notað við ýmsum gigtsjúkdómum, þvagsýrugigt, verkjum og bólgum af ýmsum toga, eins og eftir slys og aðgerðir, tíðaverkjum og bakverkjum. Notkun þess við gigtsjúkdómum kallar oft á langtímameðferð en bólgueyðandi og verkjastillandi meðferð með díklófenaki er oftast skammtímameðferð. Hlaupið er notað staðbundið á húð við álags- og íþróttameiðslum eins og vöðva- og liðverkjum, tognunum og bólgum. Burðarefni hlaupsins hefur auk þess kælandi áhrif. Kostir þess að nota lyfið staðbundið á húð í stað þess að taka lyfið inn eru m.a. þeir að mun minni líkur eru á aukaverkunum sem og milliverkunum við önnur lyf. Stungulyfið er notað við bráðu nýrna- og gallsteinakasti.

Sýruþolnar töflur til inntöku, útvortis hlaup, endaþarmsstílar og stungulyf í vöðva.

Töflur og stílar: Fullorðnir: 25-50 mg í senn 3svar á dag. Börn eldri en 2ja ára: 0,5-3 mg á hvert kg líkamsþyngdar á dag. Töflurnar gleypist heilar. Hlaup: Borið á aum eða bólgin svæði 3-4 sinnum á dag. Stungulyf: 75 mg í senn.

Töflurnar ná hámarksþéttni í blóði eftir 2 klst. Stungulyfið fer að virka innan 20 mín.

Mismunandi eftir ástandi sjúklings og lyfjaformi.

Engin.

Geymist í lokuðum umbúðum við stofuhita þar sem börn hvorki ná til né sjá.

Taktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ekki taka tvo skammta í einu.

Sjúkdómurinn getur versnað þegar hætt er að taka lyfið. Ekki hætta töku lyfsins nema í samráði við lækni.

Stakir skammtar sem eru litlu stærri en venjulega ættu ekki að skapa vanda. Ef teknir eru stórir skammtar eða vart verður við einhver óvenjuleg einkenni skaltu hafa samband við lækni.

Æskilegt er að fara reglulega í eftirlit til læknis og láta meta áhrif lyfsins á lifur, nýru, blóðhag og maga. Stungulyfið á ekki að nota lengur en í 2 daga.

Nánari upplýsingar um lyfið er að finna í SPC texta og í fylgiseðli lyfsins, sem má finna á heimasíðu Lyfjastofnunar. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.