Lyfjabókin

Terbinafin Actavis

Terbinafin Actavis er breiðvirkt sveppalyf. Það er notað við sýkingum í tá- og fingurnöglum, á fótum og höndum og líka á útbreiddar sýkingar í húð, m.a. á búk og í nára. Virka efnið terbínafín hefur sveppadrepandi verkun. Það drepur sveppi, annars vegar með því að hindra svokallaða sterólmyndun í sveppum og hins vegar hemur það ákveðið lífsnauðsynlegt ensím í frumuhimnu sveppa. Sveppasýkingar í nöglum geta verið erfiðar viðureignar og langvinnar. Ástæðan er meðal annars sú að þrátt fyrir að meðferð sé lokið þá tekur það venjulega nokkuð langan tíma fyrir heilbrigða nögl að vaxa fram.

Töflur til inntöku.

250 mg á dag. Töflurnar gleypist heilar með vatnsglasi.

Misjafnt eftir tegund sýkingar og hversu alvarleg hún er.

Lyfið situr eftir í fitulagi undir húð í nokkrar vikur eftir að meðferð lýkur.

Engin.

Geymist í lokuðum umbúðum við stofuhita þar sem börn hvorki ná til né sjá.

Taktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ekki taka tvo skammta í einu.

Taktu lyfið svo lengi sem læknir segir fyrir um. Hætti lyfjatöku of snemma aukast líkur á því að sýkingin nái sér aftur á strik.

Stakir skammtar sem eru litlu stærri en venjulega ættu ekki að skapa vanda. Ef barn notar lyfið, notaðir eru stórir skammtar eða ef vart verður við einhver óvenjuleg einkenni skal hafa samband við lækni.

Án vandkvæða. Lyfið er venjulega notað í nokkrar vikur og allt upp í 6 mánuði.

Nánari upplýsingar um lyfið er að finna í SPC texta og í fylgiseðli lyfsins, sem má finna á heimasíðu Lyfjastofnunar. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.