Lyfjabókin

Tarivid (afskráð júl. 2011)

Ófloxacín er notað í skammtímameðferð við sýkingum af völdum sýkla sem eru næmir fyrir ófloxacíni. Lyfið verkar á þann hátt að það hindrar bakteríur að skipta sér, sem aftur leiðir til þess að þær geta ekki fjölgað sér og deyja fljótt. Töflurnar eru gefnar við endurteknum eða blönduðum þvagfærasýkingum, lekanda af völdum gónókokka sem framleiða penisilínasa og iðrasýkingum (t.d. salmonella). Innrennslislyfið er gefið við blönduðum þvagfærasýkingum af völdum Gram-neikvæðra klasasýkla, en þeir eru næmir fyrir ófloxacíni. Þetta er gert þegar ekki er unnt að koma við lyfjum til inntöku. Lyfið hefur skjóta bakteríudrepandi verkun. Lyfið er breiðvirkt og virkar bæði á Gram-jákvæða og Gram-neikvæða bakteríur. Ekkert krossónæmi er við aðra flokka sýkingalyfja.

Töflur til inntöku.

200-400 mg í senn 1-2svar á dag. Töflurnar takist inn með vatnsglasi. Töflunum má skipta.

Misjafnt eftir því hvar sýkingin er og hversu næmir sýklarnir eru fyrir lyfinu. Eftir inntöku nær lyfið hámarksþéttni í blóði innan 1 klst.

Um 12 klst. eftir stakan skammt.

Engin.

Geymist í lokuðum umbúðum við stofuhita þar sem börn hvorki ná til né sjá.

Taktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ekki taka tvo skammta í einu.

Taktu lyfið eins lengi og læknir segir til um eða ljúktu við skammtinn sem þér var úthlutaður, jafnvel þótt einkenni sýkingarinnar séu ekki lengur til staðar. Annars er hætta á því að sýkingin nái sér aftur á strik og bakteríur myndi ónæmi fyrir lyfinu.

Hafðu samband við lækni í öllum tilvikum. Stakir skammtar sem eru litlu stærri en venjulega ættu ekki að skapa vanda. Ef teknir eru mjög stórir skammtar eða ef vart verður við einhver óvenjuleg einkenni skal hafa samband við lækni. Mikilvægustu merki bráðrar ofskömmtunar eru einkenni eins og rugl, svimi, skert meðvitund og krampar auk einkenna frá meltingarfærum. Almenn meðferð er stuðningsmeðferð.

Lyfið er ætlað til skammtímanotkunar.

Nánari upplýsingar um lyfið er að finna í SPC texta og í fylgiseðli lyfsins, sem má finna á heimasíðu Lyfjastofnunar. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.