Lyfjabókin

Sandimmun Neoral

Ciklospórín er kröftugt, ónæmisbælandi lyf. Það er notað til að sporna við því að nýju líffæri sé hafnað eftir líffæraflutning og við slæmum sjálfsofnæmissjúkdómum sem hafa ekki svarað annarri meðferð. Það sem hamlar helst árangur líffæraflutninga er það að ónæmiskerfi líkamans snýst gegn nýja líffærinu og skemmir það. Til þess að hindra þetta þarf að gefa ónæmisbælandi lyf ævilangt eftir líffæraígræðslu. Þeir sjálfsofnæmissjúkdómar sem ciklospórín er notað við eru t.d. slæm tilfelli af psoríasis og alvarleg iktsýki.

Hylki og mixtúra til inntöku.

Skammtastærðir eru mjög misjafnar eftir sjúkdómum, ástandi sjúklings og öðrum lyfjum sem eru notuð. Hylkin gleypist heil.

Hámarksblóðþéttni næst eftir 1-2 klst. frá inntöku. Áhrif á sjúkdóminn koma fram eftir mun lengri tíma.

Verkunartími er mjög mismunandi eftir einstaklingum.

Ekki má drekka greipaldinsafa með hylkjunum (eykur styrk lyfs í blóði). Alltaf skal gleypa hylkin með sama vökvanum, t.d. annað hvort alltaf með vatni eða alltaf með mjólk. Forðastu fæðu sem inniheldur mikið af kalíum, t.d. þurrkaða ávexti.

Geymist í lokuðum umbúðum við stofuhita þar sem börn hvorki ná til né sjá. Nota verður mixtúruna innan 2ja mánaða frá því að umbúðir eru opnaðar.

Taktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ekki taka tvo skammta í einu.

Ekki hætta töku lyfsins nema í samráði við lækni. Draga verður smám saman úr skömmtum á löngum tíma áður en töku lyfsins hættir.

Hafðu samband við lækni í öllum tilfellum.

Fylgjast þarf reglulega með árangri meðferðar, blóðþéttni lyfsins og nýrnastarfsemi.

Nánari upplýsingar um lyfið er að finna í SPC texta og í fylgiseðli lyfsins, sem má finna á heimasíðu Lyfjastofnunar. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.