Lyfjabókin

Furadantin

Furadantin, sem inniheldur virka efnið nítrófúrantóín, er notað við þvagfærasýkingum. Það skaðar erfðaefni baktería og hemur þannig vöxt margra tegunda sem algengt er að valdi sýkingum í þvagfærum. Eftir inntöku safnast lyfið fyrir í þvagi en er aðeins í litlu magni annars staðar í líkamanum. Það er því ekki nothæft við öðrum sýkingum. Ónæmi baktería fyrir lyfinu er sjaldgæft enn sem komið er. Æskilegt er að nota ekki lyfið nema áður hafi verið gengið úr skugga um að þær bakteríur sem valda sýkingunni séu næmar fyrir því.

Töflur til inntöku.

Fullorðnir, bráð sýking: 50-100 mg í senn 3-4 sinnum á dag. Fyrirbyggjandi: 50-100 mg að kvöldi. Börn eldri en 1 mánaða: 3 mg á hvert kg líkamsþyngdar á dag í 2-3 skömmtum. Töflurnar takist með mat. Má mylja þær.

2½-4½ klst. eftir inntöku.

5-8 klst. eftir stakan skammt.

Engin.

Geymist í lokuðum umbúðum við stofuhita þar sem börn hvorki ná til né sjá.

Taktu lyfið um leið og þú manst eftir því. Ef lyfið er tekið 3svar eða oftar á dag skal láta líða 2-4 klst. milli þeirra skammta sem á eftir að taka þann daginn. Ekki taka tvo skammta í einu.

Ef læknir hefur ekki tekið annað fram skal ljúka þeim skammti sem er úthlutað, jafnvel þó að einkenni sýkingarinnar séu horfin. Ef töku lyfsins er hætt of snemma getur sýkingin náð sér aftur á strik.

Stakir skammtar sem eru litlu stærri en venjulega ættu ekki að skapa vanda. Ef stórir skammtar eru teknir eða ef vart verður við einhver óvenjuleg einkenni skal hafa samband við lækni.

Fylgjast þarf reglulega með áhrifum lyfsins á lungu.

Nánari upplýsingar um lyfið er að finna í SPC texta og í fylgiseðli lyfsins, sem má finna á heimasíðu Lyfjastofnunar. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.