Lyfjabókin

Fosavance

Fosavance inniheldur virku efnin alendrónat og kólekalsíferól. Venjulega er jafnvægi á niðurbroti og myndun beina í líkamanum, en með aldrinum verður beinamyndun smám saman hægari en niðurbrot þeirra. Eftir tíðahvörf hjá konum er sérstaklega mikil hætta á beinþynningu og þar með aukinni tíðni beinbrota. Alendrónat kemur í veg fyrir beinþynningu, hjálpar til við að endurmynda bein og dregur úr hættu á samfalli hryggjarliða og mjaðmarbrotum. Kólekalsíferól er D-vítamín, en það vítamín er nauðsynlegt fyrir upptöku á kalki í bein líkamans. Skortur á D-vítamíni getur þannig valdið beinþynningu. Fosavance er ætlað til meðferðar á beinþynningu eftir tíðahvörf hjá sjúklingum með hættu á D-vítamín skorti og til að draga úr hættu á samfalli hryggjarliða og mjaðmarbrotum. Mikilvægt er að fara nákvæmlega eftir leiðbeiningum læknis um töku lyfsins.

Töflur til inntöku.

Ein tafla einu sinni í viku, að morgni, a.m.k. ½ klst. áður en matar eða drykkjar er neytt eða önnur lyf eru tekin. Töflurnar gleypist með fullu glasi af venjulegu vatni. Má hvorki tyggja þær né leysa upp. Ekki má leggjast í lárétta stöðu fyrr en eftir fyrstu máltíð dagsins. Hver tafla inniheldur 70 mg alendrónat og 70 míkrógrömm kólekalsíferól.

Áhrif lyfsins á beinþynningu koma fram á 3 vikum.

Eftir stöðuga töku lyfsins haldast áhrifin á beinþynningu í 12 til 60 vikur eftir að töku þess er hætt.

Nauðsynlegt er að neyta kalkríkrar fæðu.

Geymist í lokuðum umbúðum við stofuhita þar sem börn hvorki ná til né sjá.

Taktu lyfið næsta morgun eftir að þú manst eftir því. Haltu síðan áfram að taka eina töflu á viku sama dag og venjulega. Ekki taka tvo skammta í einu.

Ekki hætta töku lyfsins nema í samráði við lækni.

Stakir skammtar sem eru litlu stærri en venjulega ættu ekki að skapa vanda. Ef teknir eru mjög stórir skammtar eða vart verður við einhver óvenjuleg einkenni skal hafa samband við lækni.

Án vandkvæða.

Nánari upplýsingar um lyfið er að finna í SPC texta og í fylgiseðli lyfsins, sem má finna á heimasíðu Lyfjastofnunar. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.