Lyfjabókin

Duac

Duac hlaup er notað við meðhöndlun á vægum til miðlungs svæsnum gelgjubólum. Hlaupið hefur bæði væga hyrnisleysandi verkun og bakteríudrepandi áhrif og verkar sérstaklega gegn gelgjubólum sem í er bólga eða þar sem sáramyndun á sér stað. Duac inniheldur tvö virk efni; klindamýcín og benzóýl peroxíð. Klindamýcín er breiðvirkt sýklalyf sem hindrar próteinframleiðslu í bakteríum og hemur þar með vöxt þeirra. Lyfið er notað við sýkingum af völdum baktería sem eru næmar fyrir því og er oft notað staðbundið við gelgjubólum. Það fækkar einnig fríum fitusýrum á yfirborði húðarinnar þar sem það er borið á. Benzóýl peroxíð er eingöngu notað útvortis og hefur góð áhrif, bæði eitt sér og sem einn þáttur í meðferð með fleiri lyfjum. Auk sýkladrepandi áhrifa hefur það hyrnisleysandi verkun, dregur úr fituframleiðslu og þurrkar húðina.

Útvortis hlaup.

Notist útvortis á sýkt svæði einu sinni á dag að kvöldi. Fyrst þarf að þvo bólusvæðið vandlega, skola með volgu vatni og þerra varlega.

Ekki að fullu þekkt og er jafnframt misjafnt eftir því hversu næmir sýklarnir eru fyrir virku efnunum. Í sumum tilfellum þarf 4-6 vikna meðhöndlun áður en bati kemur fram.

Bakteríudrepandi áhrif benzóýl peroxíðs vara í minnst 2 sólarhringa en verkunartími klindamýcíns er misjafn eftir því hversu næmir sýklarnir eru fyrir lyfinu.

Engin.

Geymist í lokuðum umbúðum við stofuhita þar sem börn hvorki ná til né sjá. Nota skal lyfið innan 2ja mánaða frá því að innri umbúðir eru opnaðar.

Notaðu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að nota lyfið eins og venjulega. Ekki nota tvo skammta í einu.

Hætta má notkun lyfsins þegar einkenni eru ekki lengur til staðar eða þegar ekki er þörf á lyfinu. Samfelld meðferð ætti ekki að vera lengri en 12 vikur nema í samráði við lækni.

Lítil hætta er á öðrum einkennum en staðbundinni ertingu undan lyfinu. Hafðu samband við lækni ef einhver óvenjuleg einkenni koma fram.

Samfelld meðferð ætti ekki að vara lengur en í 12 vikur.

Nánari upplýsingar um lyfið er að finna í SPC texta og í fylgiseðli lyfsins, sem má finna á heimasíðu Lyfjastofnunar. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.